இனப் பிரச்சினைக்குத் தீர்வு காண்பதற்கு அனைத்துத் தரப்புக்களும் இணங்கியுள் ளன. அதற்காகப் புதிய அரசமைப்பு உருவாக்கு வதற்கான முயற்சிகள் முன்னெடுக்கப்படுகின்றன. அந்த முயற்சி அவ்வளவு இலகுவானது அல்ல. அதனை நிறைவேற்றுவது இலேசான காரியமும் அல்ல.
இவ்வாறு அமைச்சரவைப் பேச்சாளரும், அமைச் சருமான ராஜித சேனாரட்ன தெரிவித்தார். யாழ்ப்பாணம் போதனா மருத்துவமனையில் 3 அபிவிருத்தித் திட்டங்களை நேற்று அமைச்சர் ஆரம்பித்தார். அதன்பின்னர் கருத்துத் தெரிவித்தபோதே அவர் இவ்வாறு தெரிவித்தார்.
அவர் தெரிவித்தாவது
இனப் பிரச்சினையை முடிவுக்கு கொண்டு வருவதற்கு அனைத்துக் கட்சிகளும் சம்மதம் தெரிவித்துள்ளன. அதற்காக புதிய அரசமைப்பு உருவாக்கப்பட வேண்டியுள்ளது. அதைச் செய்வது மிக இலகுவான காரியம் அல்ல.
இனங்களுக்கிடையிலான வெறுப்புணர்வுகளுக்கு இடமளிக்காது பிரச்சினைகளைப் பேசித் தீர்ப்பதற்கு அனைவரும் பிரதான அரசியல் நீரோட்டத்தில் இணைந்து கலந்துரையாடலுக்கு முன்வர வேண்டும்.
2015ஆம் ஆண்டு உருவாக்கப்பட்ட எமது அரசு வடக்கில் கூடிய கவனம் செலுத்தியிருந்தது. தமிழ் மக்களின் வாழ்க்கை தரத்தை உயர்த்துவதற்காகவே நாம் கூடிய கவனமெடுத்தோம். இதுவே எமது கொள்கை. நாம் முன்னைய அரசு போல அல்ல.
30 ஆண்டுக்குப் பின்னரான அபிவிருத்தி இந்தப் பகுதிக்கு தேவை என்பதனால் சுகாதாரத் துறையை பொறுத்தவரையில் அனைத்து உதவிகளையும் வழங்கி வடக்கைக் கட்டியெழுப்பியுள்ளோம். உதவிகளை வழங்குவதனூடாக இந்த மாகாணத்தினையும் ஏனைய மாகாணத்தை போல அவற்றின் தரத்துக்கு கொண்டு வருவதே எமது நோக்கம்.
வடக்கிலுள்ள பிரச்சினைகளை கையாள்வது தொடர்பாக நாம், ஏற்கனவே உங்களுக்கு சுதந்திரத்தையும், உரிமையையும், சுயாதீனமான செயற்பாட்டையும் வழங்கியிருந்தோம். வடக்கில் உரிமைகளைக் கோரி போராட்டம் நடத்துவதனை நான் தொலைக்காட்சிகளில் பார்த்துள்ளேன்.
அந்த உரிமைகள் கிடைத்தால் முதலில் மகிழ்ச்சியடைவது நானாகவே இருக்கும்.
30 ஆண்டுகளுக்குப் பின்னர் அரசுக்கு எதிராக போராட்டங்களையும், கோசங்களையும், பணிப் புறக்கணிப்புக்களையும் முன்னெடுப்பதற்கு சந்தர்ப்பம் கிடைத்துள்ளது. இது தொடர்பில் நான் மகிழ்ச்சியடைகின்றேன்.
ஏனெனில் முன்னர் இவ்வாறான போராட்டங்களை மேற்கொண்டால் இராணுவமும் பொலிஸாரும் அவற்றை அடக்கி விடுவார்கள். ஆனால் இப்போது சிவாஜிலிங்கம் போன்றோரின் தலைமையில் போராட்டங்கள் நடைபெறுகின்றன என்றார்.
3
