சம்மாந்துறை, வளத்தாப்பிட்டி பிரதேசத்தில் இடம்பெற்ற பாரிய வாகன விபத்தில் ஒரே குடும்பத்தைச் சேர்ந்த இருவர் மரணமடைந்துள்ளதோடு, சிறுவன் ஒருவன் உள்ளிட்ட இருவர் காயமடைந்துள்ளார்.
கண்டி – மாவனல்லையில் இருந்து வந்த 58-9974 எனும் பதிவு இலக்கத்தையுடைய வேனும் LA- 7077 எனும் பதிவு இலக்கத்தையுடைய டிப்பர் ரக லொறியும் மோதியதில் இப்பாரிய விபத்து ஏற்பட்டுள்ளதாக சம்மாந்துறை பொலிஸார் தெரிவித்துள்ளனர். வளத்தாப்பிட்டி வாகன புகை பரிசோதனை நிலையத்திற்கு முன்னால் நேற்று (28) பிற்பகல் 2.30 மணியளவில் இச்சம்பவம் இடம்பெற்றுள்ளது.
இவ்விபத்தில், ஒரே குடும்பத்தைச் சேர்ந்த சின்னாலெப்பை அஹமது யாசின் (55), சக்காப் சியானா (42) ஆகிய இருவருமே இவ்வாறு உயிரிழந்துள்ளனர்.
இவ்விபத்துச் சம்பவத்தில் படுகாயமுற்ற நிஸாம்டீன் மின்ஹாஜ் எனும் 12 வயது சிறுவன், அம்பாறை வைத்தியசாலையில் சிகிச்சை பெற்று வருகின்றார். காயமடைந்த டிப்பர் வாகன சாரதி சம்மாந்துறை வைத்தியசாலையில் சிகிச்சை பெற்று வருகின்றார்.
இவ்விபத்து தொடர்பான மேலதிக விசாரணைகளை சம்மாந்துறை பொலிஸார் மேற்கொண்டு வருகின்றனர்.
