ஈருருளியில் வந்த குடும்பப் பெண்ணை வழிமறித்த கொள்ளையர்கள் அவர் அணிந்திருந்த 3 பவுண் தங்கச் சங்கிலியை கொள்ளையடித்துச் சென்ற சம்பவம் நல்லூர் முடமாவடிப் பகுதியில் நேற்றுப் பி.ப. 2.15 மணியளவில் இடம்பெற்றுள்ளது.
முடமாவடி அம்மன் வீதி வழியாக, ஈருருளியில் வந்த குடும்பப் பெண்னே கொள்ளையர்களால் குறிவைக்கப்பட்டுள்ளார். அவருக்கு எதிரே ஈருருளியில் வந்த இரண்டு கொள்ளையர்கள் அவரை வழிமறித்தனர்.
வாள்களைக் காட்டிப் பெண்ணை அச்சுறுத்தினர். பெண் கூக்குரலிட்ட போது அவர் பயணித்த ஈருருளியைப் பறித்து தள்ளி விழுத்தி பின்னர் அவரது கழுத்தில் இருந்த தங்கச் சங்கிலியைப் பறித்தனர், என்று சம்பவத்தை நேரில் பார்த்தவர்கள் தெரிவித்தனர்.சங்கிலியைப் பறிகொடுத்து தேம்பித் தேம்பி அழுதவாறு வீதியோரம் நின்ற பாதிக்கப்பட்ட பெண்ணுக்கு, மக்கள் ஆறுதல் கூறியதைக் காணமுடிந்தது.
