சென்னைக்கு கடத்தி வரப்பட்ட 40 கிலோ கஞ்சாவை சென்ட்ரல் ரெயில் நிலைய வாசலில் போலீசார் கைப்பற்றி உள்ளனர்.
வட மாநிலங்களில் இருந்து தமிழகத்திற்கு கஞ்சா உள்ளிட்ட போதைப் பொருட்கள் கடத்தி வரப்படுகிறது. இதனைத் தடுக்க சென்னை சென்ட்ரல் ரெயில் நிலையத்தில் போலீசார் தீவிர கண்காணிப்பில் ஈடுபட்டுள்ளனர். பயணிகளின் உடமைகளை போலீசார் அவ்வப்போது சோதனை செய்வது வழக்கம். சில சமயங்களில் சந்தேகத்தின்பேரில் பொருட்கள் முழுமையாக சோதனையிடப்படும்.
அவ்வகையில் இன்று காலை சென்ட்ரல் ரெயில் நிலையத்தில் இருந்து வெளியேறிய ஒரு பெண் பயணியிடம் இருந்து 40 கிலோ கஞ்சாவை போலீசார் கைப்பற்றினர். ரெயிலில் கடத்தி வரப்பட்ட கஞ்சா மூட்டைகளை ரெயில் நிலைய வாசலுக்கு கொண்டு வந்து ஆட்டோவில் ஏற்ற முயன்றபோது அந்த பெண்ணை கைது செய்து, கஞ்சா மூட்டைகளை கைப்பற்றினர்.
கைது செய்யப்பட்ட பெண் யாரிடம் இருந்து கஞ்சாவை வாங்கி வந்தார்? சென்னையில் யாருக்கு விற்பனை செய்ய கொண்டு வந்துள்ளார்? என்பது குறித்து போலீசார் விசாரித்து வருகின்றனர்.
