ஐந்து மாணவர்கள் உள்ளிட்ட 11 பேர் கடத்தி காணாமல் ஆக்கப்பட்டமை தொடர்பில் தொலைபேசி அழைப்புக்களை பகுப்பாய்வு செய்யும் நடவடிகைகள் தற்போது இடம்பெற்று வருவதாக குற்றப் புலனாய்வுப் பிரிவு நேற்று நீதிமன்றத்துக்கு அறிவித்தது. கடத்தல், கப்பம் கோரல் தொடர்பில் இதன்போது பல தகவல்களை அம்பலப்படுத்தி வருவதாகவும் அது தொடர்பிலான விசாரணைகள் தொடர்வதாகவும் குற்றப் புலனாய்வுப் பிரிவின் கூட்டுக் கொள்ளை தொடர்பிலான விசாரணைப் பிரிவின் பொறுப்பதிகாரி பொலிஸ் பரிசோதகர் நிசாந்த சில்வா நீதிவான் லங்கா ஜயரத்னவுக்கு அறிவித்தார்.
அதன்படி இந்த விவகாரத்தில் இதுவரை கைது செய்யப்பட்ட 9 பேரில் விளக்கமறியலில் வைக்கப்பட்டுள்ள காமினி, மெண்டிஸ் ஆகிய இரு முன்னாள் கடற்படை புலனாய்வாளர்களையும் எதிர்வரும் எட்டாம் திகதிவரை விளக்கமறியலில் வைக்க நீதிவான் உத்தரவிட்டார்.
இதன்போது மன்றுக்கு விசாரணைகளை தெளிவுபடுத்திய பொலிஸ் பரிசோதகர் நிசாந்த சில்வா, விசாரணைகளை மிக விரைவில் நிறைவு செய்ய எதிர்பார்ப்பதாகவும், தற்போது கடத்தல், கப்பம் கோரியோர் தொடர்பில் மேலும் தகவல்களை வெளிப்படுத்த அடையாளம் காணப்பட்ட தொலைபேசி இலக்கங்களை மையப்படுத்திய விசேட பகுப்பாய்வுகள் இடம்பெறுவதாகவும் குறிப்பிட்டார்.
கடற்படை புலனாய்வுப் பிரிவின் முன்னாள் வீரரான கஸ்தூரிகே காமினி, அருண துஷார மெண்டிஸ் ஆகியோரின் விளக்கமறியலை நீடித்த நீதிவான் வழ க்கை எதிர்வரும் பெப்ரவரி 8 ஆம் திகதிக்கு ஒத்திவைத்தார்.
