திட்டமிட்ட குற்றங்கள் தொடர்பில் இலங்கை பொலிஸாரால் தேடப்பட்டு வரும் தற்போது டுபாயில் இருப்பதாக நம்பப்படும், பிரபல பாதாள உலக தலைவர்களான கொஸ்கொட சுஜீ மற்றும் மாகந்துரே மதூஷ் ஆகியோருக்கு எதிராக சிவப்பு மற்றும் நீல அறிவித்தல்களை சர்வதேச பொலிஸார் பிறப்பித்துள்ளனர். மனிதப் படுகொலைகள் மற்றும் போதைப் பொருள் கடத்தல் ஆகிய திட்டமிட்ட குற்றங்கள் தொடர்பிலேயே இந்த சிவப்பு, நீல அறிவித்தல்கள் பிறப்பிக்கப்பட்டுள்ளன.
தெற்கின் பிரபல பாதாள உலக தலைவனாக கருதப்படும் கொஸ்கொட சுஜீ எனப்படும் கஜமுனி சுஜீவ டி சில்வாவுக்கு மனிதப் படுகொலைகள் தொடர்பிலும் போதைப்பொருள் கடத்தல் தொடர்பிலும் சர்வதேச பொலிஸாரால் சிவப்பு அறிவித்தல் பிறப்பிக்கப்பட்டுள்ளது.
இந் நிலையில் மாகந்துரே மதூஷ் எனப்படும் சமரசிங்க ஆரச்சிகே மதூஷ் லக் ஷித்தவுக்கு எதிராக இலங்கை பொலிஸாரினால் சர்வதேச பொலிஸாருக்கு சாட்சிகள் தொடர்ந்தும் முன் வைக்கப்பட்டு வரும் நிலையில், சிவப்பு அறிவித்தல் பிறப்பிக்கப்படும் செயன்முறை பூர்த்தியடையும் வரையில், அவருக்கு எதிராக நீல அறிவித்தல் பிறப்பிக்கப்பட்டுள்ளது.
பொலிஸ் விசேட அதிரடிப்படையின் கட்டளைத் தளபதியும், திட்டமிட்ட குற்றங்கள் மற்றும் போதைப்பொருள் தடுப்புப் பிரிவுக்கு பொறுப்பான சிரேஷ்ட பிரதிப் பொலிஸ்மா அதிபருமான எம்.ஆர். லதீபின் கீழ் இயங்கும் பாதாள உலகத்தை ஒழிக்கும் பிரிவான திட்டமிட்ட குற்றங்கள் தடுப்புப் பிரிவின் ஊடாக திரட்டப்பட்ட 25 பாதாள உலக குழுக்கள் மற்றும் அதனுடன் தொடர்புடையோரின் சாட்சியங்கள் சர்வதேச பொலிஸாருக்கு இந்த சிவப்பு அறிவித்தல்களைப் பெற்றுக்கொள்வதற்காக அனுப்பி வைக்கப்பட்டுள்ளன.
பொலிஸ் ஆவணப் பிரிவின் ஊடாக குற்றப் புலனாய்வுப்பிரிவின் சர்வதேச பொலிஸ் பிரிவுக்கு அந்த தகவல்கள் வழங்கப்பட்டு, அவர்கள் ஊடாக அவை சர்வதேச பொலிஸாருக்கு வழங்கப்பட்டுள்ளன.
இந் நிலையிலேயே தற்போது சிவப்பு மற்றும் நீல அறிவித்தல்கள் இவ்விரு பாதாள உலக தலைவர்களுக்கும் எதிராக பிறப்பிக்கப்பட்டுள்ளதாக பொலிஸ் தலைமையகத்தின் உயர் அதிகாரி ஒருவர் தெரிவித்தார்.
எதிர்வரும் உள்ளூராட்சித் தேர்தலுக்கு முன்னர் கொஸ்கொட சுஜீயையும், மாகந்துரே மதூஷையும் எப்படியேனும் கைதுசெய்ய திட்டமிட்ட குற்றங்கள் தடுப்புப் பிரிவு பல்முனை திட்டங்களை வகுத்துள்ள நிலையிலேயே இந் நகர்வுகள் முன்னெடுக்கப்பட்டுள்ளன.
