ஊழல், மோசடிகள், குற்றங்கள் நிறைந்த ஆட்சியில் இருந்து நாட்டையும் மக்களையும் மீட்டெடுக்கவே மக்கள் விடுதலை முன்னணி மாற்றுப்பாதையில் களமிறங்குகின்றது. உள்ளூராட்சி சபையின் எமது வெற்றி 2020 ஆம் ஆண்டு ஆட்சி மாற்றத்தை தீர்மானிக்கும் போராட்டம் வரையில் நீடிக்கும் என மக்கள் விடுதலை முன்னணியினர் தமது தேசிய மாநாட்டில் சூளுரைத்துள்ளனர்.
எமக்கு அதிகாரங்களை தாருங்கள் மக்களின் நிதியில் ஒரு ரூபாய் கூட ஊழல் இடம்பெறாத ஆட்சியை முன்னெடுத்து காட்டுகின்றோம் எனவும் அவர்கள் வாக்குறுதி வழங்கியுள்ளனர்.
மக்கள் விடுதலை முன்னணியின் உள்ளூராட்சி மன்ற வேட்பாளர்கள் மாநாடு நேற்று கொழும்பு சுகததாச உள்ளக விளையாட்டரங் கில் இடம்பெற்றது. மக்கள் விடுதலை முன் னணியின் தலைவர் அனுரகுமார திஸாநாயக உள்ளிட்ட கட்சியின் பாராளுமன்ற உறுப்பினர்கள், மாகாணசபை உறுப்பினர்கள், உள்ளூராட்சி மன்ற வேட்பாளர்கள் மற்றும் மக்கள் விடுதலை முன்னணியின் சர்வதேச பிரதிநிதிகள் உள்ளிட்ட பலர் கலந்துகொண்டனர்.
மாநாட்டில் மக்கள் விடுதலை முன்னணியின் தலைவர் அனுரகுமார திஸாநாயக உரையாற்றுகையில்,
மக்கள் விடுதலை முன்னணி நீண்டதொரு போராட்டத்தை நடத்தி இன்று முக்கியமான ஒரு கட்டத்திற்கு நாட்டை கொண்டுவந்துள்ளது. உள்ளூராட்சி மன்றத் தேர்தல் நடத்தப்படாது மூன்று ஆண்டுகளை கடந்துள்ள நிலையில் தேர்தல் நடத்தப்பட வேண்டும் என்ற மிகப்பெரிய போராட்டத்தை நாம் பாராளுமன்றத்தின் உள்ளும், வெளியிலும் முன்னெடுத்தோம். அவ்வாறிருக்கையில் இன்று அரசாங்கம் வேறு வழியில்லாது மக்களுக்கு பொறுப்புக் கூறவேண்டிய கட்டாயத்திற்கு தள்ளப்பட்டுள்ளது. இதற்கு மக்கள் விடுதலை முன்னணியே முக்கிய காரணமாகும். இந்தத் தேர்தலை சாதாரண தேர்தலாக கருத வேண்டாம். உள்ளூராட்சி மன்றங்களுக்கு நடத்தப்படும் தேர்தலாக இருந்தாலும் இதுவே நாட்டின் மாற்றத்தை உருவாக்கும் அடித்தளமாகும். அவ்வாறிருக்கையில் இந்த உள்ளூராட்சி மன்றங்களில் மக்கள் விடுதலை முன்னணியின் பலத்தினை உருவாக்க நாம் சகல முயற்சிகளையும் முன்னெடுத்து வருகின்றோம். 2020 ஆம் ஆண்டு மிகப்பெரிய புரட்சிகர மாற்றத்தை உருவாக்கும் ஆண்டாக அமையும். அதில் மக்கள் விடுதலை முன்னணியின் பலம் என்னவென்பது அனைவருக்கும் தெரியவரும். எமது ஆட்சியினை அமைத்து மக்களின் சகல பிரச்சினைகளுக்கும் தீர்வுகளை பெற்றுக்கொடுத்து பொருளாதார ரீதியில் நாட்டை கட்டியெழுப்புவதே எமது நோக்கமாகும் என்றார்.
ஜே.வி.பி.யின் பொதுச்செயலாளர் டில் வின் சில்வா உரையாற்றுகையில்,
நாட்டினை மாற்றக்கூடிய, தலைமைத்துவத்தை ஏற்றுக்கொள்ளும், ஊழலுக்கு எதிரான, மக்கள் சேவையில் ஈடுபடும் நபர்கள் அனைவரும் எம்முடன் இணையுங்கள் என்பதை நாம் தொடர்ச்சியாக கோரி வருகின்றோம். இம்முறை உள்ளூராட்சி சபைத் தேர்தலில் மக்கள் அவ்வாறான ஒரு மாற்றத்தை ஏற்படுத்த வேண்டும். இந்த தேர்தல் மிகவும் முக்கியமான தேர்தலாகும். இதற்கு முன்னர் தேர்தல் நடப்பதையும் வாக்களிப்பதையும் கூட ஆட்சியாளர்கள் தான் தீர்மானித்தனர். எனினும் இம்முறை அவர்களுக்கு வேட்புமனுவைக் கூட சரியாக தாக்கல் செய்துகொள்ள முடியாத நிலைமை ஏற்பட்டுள்ளது. இந்த நிலைமைக்கு அவர்களை தள்ள மக்களே காரணமாகும். மக்கள் இன்று சரியான நபர்களை எதிர்பார்க்கின்றனர். அதேபோல் மக்கள் விடுதலை முன்னணி மட்டுமே நிராகரிக்கப்படாத நபர்களை தெரிவுசெய்து களத்தில் இறக்கியுள்ளது.
பிரதான இரண்டு கட்சிகளும் தமது அழுத்தத்தில் தேர்தலை நடத்த முன்வந்துள்ளன . மஹிந்த அணியினர் கூட்டணியா தனித்தா என்ற தீர்மானத்தை இன்னும் எடுக்க முடியவில்லை. மூன்று கட்சிகளும் பல்வேறு பிரச்சினைகளுக்கு முகங்கொடுத்து தேர்தலில் களமிறங்கியுள்ளனர். எனினும் மக்கள் விடுதலை முன்னணி மாத்திரம் மக்களின் மீதான நம்பிக்கையில் வெற்றி பெறுவோம் என்ற நம்பிக்கையில் களமிறங்கியுள்ள கட்சியாகும்.
நாம் அமைச்சு பதவிகளை பெற்றுக்கொள்ள முன்வரவில்லை அதிகாரங்களை கைப்பற்றிக்கொண்டு மக்கள் சேவைக்கான சபைகளை மாற்றிக்கொள்ள வேண்டும். எமக்கு மிகவும் பெரிய பொறுப்பு உள்ளது. மக்களுக்காக நாம் சரியான திசையை அடையாளம் காட்டவேண்டும். கடந்த காலங்களில் இருந்து முன்னெடுக்கப்பட்டுவந்த அரசியல் செயற்பாடுகளில் மக்கள் சலித்துப்போயுள்ளனர். அரசியல்வாதிகள் மீதான நம்பிக்கை இழக்கப்பட்டுள்ளது. கடந்த 40 ஆண்டுகளில் அரசியல் மிகவும் கீழ்மட்ட செயற்பாடுகளை செய்துள்ளது. மக்களை பழிவாங்கும் அரசியலே முன்னெடுக்கப்பட்டு வருகின்றது. அதேபோல் உழைக்கும் அரசியல்தான் இன்று இடம்பெற்று வருகின்றது. கொள்கைகள் அனைத்தும் வெறும் காகிதத்தில் மட்டுப்படுத்தப்பட்டு அனைவரும் ஊழல் அரசியலை முன்னெடுத்து வருகின்றனர். இவர்களை தேர்தலில் தோற்கடித்தால் மாத்திரம் போதாது, அரசியலில் இருந்தே தோற்கடித்து விரட்டியடிக்க வேண்டும்.
அதற்கு மக்கள் முன்வர வேண்டும். நாட்டுக்காக செயற்படும் ஒரே கட்சி மக்கள் விடுதலை முன்னணி மட்டுமேயாகும். நாம் மட்டுமே ஊழல் இல்லாத அரசியலை செய்து வருகின்றோம். நாம் மக்கள் மூலம் உருவாகிய கட்சியாகும். எமக்கு சேர்த்து வைக்க சொத்துகள் இல்லை, ஆடம்பரம் இல்லை, வெறுமனே மக்களின் நம்பிக்கையுடன் மக்களுக்காக மக்கள் உருவாக்கிய கட்சியே ஜே.வி.பி.யாகும். ஆகவே தொடர்ந்தும் நாம் மக்களுக்காக சேவையாற்றுவோம்.
நாம் வெற்றி பெற்ற இடங்களிலும் ஏனைய கட்சிகள் வெற்றிபெற்ற இடங்களிலும் உள்ள மாற்றம் என்னவென்பதை மக்கள் உணர்வார்கள்.நாம் எவ்வாறு மக்களை இணைத்து மாற்றங்களை செய்கின்றோம் என்பதை அவதானிக்க முடியும். சாதாரணமாக ஒரு மே தினத்தில் கூட மக்கள் விடுதலை முன்னணியின் செயற்பாடுகளும் ஏனைய கட்சிகளின் செயற்பாடுகளும் எவ்வாறு என்பதை உணர்வதை போலவே இந்த தேர்தலிலும் அமை யும். இப்போது உள்ளூராட்சி சபைத் தேர்தல்தானே என சாதாரணமாக நினைக்க வேண்டாம். இப்போது ஏற்படும் மாற்றமே 2020 ஆம் ஆண்டு அரசாங்கத்தை மாற்றும் மிகப்பெரிய போராட்டமாக அமையும். அதற்கான அடித்தளத்தையே இப்போது நாம் இட்டுள்ளோம். அதிகாரத்தை எமக்கு தாருங்கள் உங்கள் கட்டளைக்கு அமைய அரசியலில் மாற்றத்தை ஏற்படுத்திக் காட்டுகின்றோம்.
கீழ் மட்டம் முதல் மத்திய அரசாங்கம் வரையில் மக்களுக்கு பொறுப்பு கூறும் ஜனநாயக, நடுநிலைவாத அரசியலை செய்து காட்டுகின்றோம். எம்மிடம் சரியான திட்டங்கள் உள்ளன, நேர்மையான அரசியல் கொள்கை உள்ளது, இனவாதம், பிரிவினைவாதம் இல்லாத செயற்பாடுகள் உள்ளன. அவற்றைக் கொண்டு நாட்டை மீட்டுத்தருகின்றோம் என்றார்.
ஜே.வி.பி யின் பாராளுமன்ற உறுப்பினர் சுனில் ஹந்துன்நெத்தி உரையாற்றுகை யில்,
இன்று நாடே ஸ்தம்பிதம் அடைந்துள்ளது, தேர்தல் நடத்தப்படாத காரணத்தினால் உள்ளூராட்சி மன்றங்கள் செயலிழந்து காணப்படுகின்றன. இந்நிலையில் மக்களின் மிகப்பெரிய அழுத்தங்கள் மூலமாக அரசாங்கம் நெருக்கடியை சந்தித்து வருகின்றது. நாமும் தொடர்ச்சியாக இந்த அழுத்தத்தை கொடுத்தோம். பாராளுமன்றத்தின் உள்ளும் பாராளுமன்றத்திற்கு வெளியிலும் நாம் மிகப்பெரிய போராட்டத்தை முன்னெடுத்தோம். அதன் விளைவாக இன்று தேர்தல் ஒன்றை நடத்த அரசாங்கம் முன்வந்துள்ளது. மேலும் இன்று பிரதான கட்சிகள் அனைத்துமே ஊழல், மோசடிகள் குற்றங்களில் சூழ்ந்து உள்ளன. திருடர்களும் அவர்களை காப்பாற்றும் நபர்களும் அரசாங்கத்தின் உள்ளேயே இருந்து செயற்பட்டு வருகின்றனர். அவ்வாறிருக்கையில் மக்கள் விடுதலை முன்னணி மட்டுமே நாட்டில் ஊழல் மோசடிகள் இல்லாத கட்சியாக உள்ளது.
எமக்கு சகல தரப்பின் ஆதரவும் கிடைத்துள்ளது. இதுவே மக்கள் எமக்கு கொடுத்த அங்கீகாரம், அதேபோல் ஊழல் மோசடிகள் இல்லாது மக்களுக்காக குரல் கொடுப்பதே நாம் மக்களுக்கு செய்யும் மிகப்பெரிய சேவையாகும் என்றார்.
ஜே.வி.பி. யின் மத்திய குழு உறுப்பினர் இராமலிங்கம் சந்திரசேகரன் உரையாற்றுகையில்,
இம்முறை உள்ளூராட்சி மன்றத் தேர்தல் மக்களுக்கு மிகவும் முக்கியமான ஒன்றாகும். இதுவரை நாட்டில் நிலவிய உள்ளூராட்சி மன்ற ஆட்சியில் இடம்பெற்ற ஊழல், மோசடிகள் அனைத்தையும் துடைத்தெறியும் ஒரு முக்கிய பொறுப்பு இன்று மக்களுக்கு வழங்கப்பட்டுள்ளது. அதற்கான களத்தில் இன்று நாம் மக்களுடன் கைகோர்த்து செயற்பட்டு வருகின்றோம். மேலும் தேர் தல் முறைமையில் மாற்றங்கள் ஏற்படுத்தவும், எல்லை நிர்ணயம் செய்யவும் நீண்ட காலம் கடந்த நிலையில் எமது போராட்டத்தின் மூலமாக இன்று ஜனநாயக ரீதியாக தேர்தலை நடத்த முடிந்துள்ளது. அதேபோல் நாட்டின் சகல பகுதிகளிலும் நாம் களமிறங்கி மக்களின் ஆட்சிக்காக செயற்பட்டு வருகின்றோம். நாட்டில் அனைத்து பகு தியிலும் ஊழல் அதிகரித்துள்ளது. பிரதான இரண்டு கட்சிகளும் குற்றவாளிகளை காப்பாற்றும் நடவடிக்கைகளை முன்னெடுத்து வருகின்றன . வடக்கினை எடுத்துப்பார்த்தால் வடக்கிலும் இன்று ஊழல் நிறைந்துள்ளது. வடமாகாண சபையின் உறுப்பினர்களே இதனை ஏற்றுக்கொள்கின்றனர்.
அவர்களின் சுயநலவாத அரசியலின் மூலமாக தமிழ் மக்களை பலிக்கடாவாக்கியுள்ளனர். ஆகவே தமிழ், முஸ்லிம், சிங்கள மக்கள் அனைவரும் இன்று ஊழல்வாத அரசியலில் ஏமாற்றப்பட்டு, பழிவாங்கப்ப ட்டு நடத்தப்படுகின்றனர். ஆகவே இந்த நாட்டை நேசிக்கும் அனைத்து மக்களும் இப் போது ஜே.வி.பி. யுடன் கைகோர்த்து நாட்டில் மாற்றம் ஒன்றை ஏற்படுத்த ஒன்றிணையுங்கள். எமது பலம் நாட்டின் வெற்றி என்பதை உறுதிசெய்து மாற்றம் ஒன்றுக்கு கைகோருங்கள் எனவும் அவர் குறிப்பிட்டார்.
