ஒருதுளி எரிபொருள் கூட செலவில்லாமல் வெறும் சூரிய ஒளியின் மூலம் கிடைக்கக்கூடிய ஆற்றலை கொண்டே 71 மணி நேரம் பறந்த சோலார் இம்பல்ஸ் விமானம் ஸ்பெயினில் தரையிறங்கியது.
ஒரே ஒரு துளி பெட்ரோல் கூட செலவு செய்யாமல் இறக்கை பகுதியில் உள்ள லித்தியம் பேட்டரி மூலம் சூரிய ஒளியை கிரகித்து, சேமித்து வைத்துக்கொண்டு பறக்கும் வகையில் இந்த ‘சோலார் இம்பல்ஸ் 2’ நவீன விமானம் வடிவமைக்கப்பட்டுள்ளது.
கடந்த 2015-ம் ஆண்டு மார்ச் 9-ம் தேதி அபுதாபியில் இருந்து கிளம்பிய சோலார் இம்பல்ஸ் விமானம், உலகம் முழுவதும் பறக்கும் லட்சியப் பயணத்தை தொடர்கிறது. பல்வேறு நகரங்களைக் கடந்து அமெரிக்காவின் பல மாநிலங்களின் வழியாக வலம்வந்த இந்த விமானம் கடந்த 11-ம் தேதி நியூயார்க் நகரில் உள்ள ஜான் எப் கென்னடி விமான நிலையத்தை வந்தடைந்தது.
சுமார் பத்து நாட்களாக ஓய்வெடுத்த சோலார் இம்பல்ஸ், கடந்த 20-ம் தேதி அதிகாலை தனது சாதனைப் பயணத்தின் முக்கியமான கட்டத்தை தொடங்கியது. அதாவது, ஜான் எப் கென்னடி விமான நிலையத்தில் இருந்து புறப்பட்டு, அட்லாண்டிக் பெருங்கடலை கடந்து ஸ்பெயின் வரை இடைநில்லா பயணம் மேற்கொள்ள திட்டமிடப்பட்டிருந்தது.
அதன்படி 71 மணி நேரம் 8 நிமிடங்கள் இடைவிடாமல் பறந்த சோலால் இம்பல்ஸ்-2, திட்டமிட்டபடி இன்று ஸ்பெயினின் செவில்லே நகரில் தரையிறங்கியது. எரிபொருளை பயன்படுத்தாமல், புகையை வெளியிடாமல் சூரிய மின்சக்தியை மட்டுமே பயன்படுத்தி இந்த தொலைவைக் கடந்திருப்பது இதுவே முதல் முறை என்பது குறிப்பிடத்தக்கது.
