எங்களை திருடர்கள் என தெரிவித்துக்கொண்டு அரசாங்கத்தில் இருப்பவர்களே திருடுகின்றனர். அத்துடன் பிணைமுறி தொடர்பில் பாராளுமன்றத்தின் நம்பிக்கைக்கு துராேகம் செய்துள்ளனர் என முன் னாள் ஜனாதிபதி மஹிந்த ராஜபக் ஷ தெரிவித்தார்.
முன்னாள் அமைச்சர் மர்ஹூம் ஏ.எச்.எம். அஸ்வரின் ஞாபகார்த்த நிகழ்வு நேற்று கொழும்பு இலங்கை மன்றக்கல்லூரியில் இடம்பெற்றது. நிகழ்வில் அதிதியாக கலந்துகொண்டதன் பின்னர் ஊடகங்களுக்கு கருத்து தெரிவிக்கையிலேயே இவ்வாறு தெரிவித்தார்.
அவர் அங்கு தொடர்ந்து கூறுகையில்,
மத்திய வங்கி பிணைமுறி மோசடியாளர்கள் யார் என்பது தற்போது வெளியில் வர ஆரம்பித்துள்ளது. பிரபல அமைச்சர்கள் அதில் தொடர்பு பட்டிருக்கின்றனர். அத்துடன் பாராளுமன்ற உறுப்பினர்கள் மீது நம்பிக்கைவைத்தே பாராளுமன்ற கோப் குழு அமைக்கப்படுகின்றது. அவர்கள் அந்த நம்பிக்கைக்கு துரோகம் செய்துள்ளனர்.
மேலும் எங்களுக்கு திருடர் என தெரிவித்துக்கொண்டு அரசாங்கத்தில் இருக்கும் அமைச்சர்கள் இன்று திருடிக்கொண்டிருக்கின்றனர். திருடர்கள் எப்போதும் அடுத்தவர்களை திருடர்கள் என்று சொல்லிக்கொண்டுதான் திருடுவார்கள். அத்துடன் இவர்கள் திருடுவது போன்று யாரும் திருடியதில்லை. எங்கள்மீது சேறு பூசுவதற்கே எங்களை திருடர்கள் என்று தெரிவிக்கின்றனர்.
அத்துடன் நாங்கள் நாட்டுக்கு செய்த சேவைகள் கண்கள் காண இருக்கின்றன. ஆனால், இந்த அரசாங்கம் அதிகாரத்துக்கு வந்து இவ்வளவு காலத்துக்கும் எதனை செய்தது. அவர்கள் செய்த எதுவும் இல்லை. தொலைபேசி உரையாடல்களை ஒட்டுக்கேட்பதனை நாங்கள் வன்மையாக எதிர்க்கின்றோம். அவ்வாறு யாருக்கும் செய்யமுடியாது. அத்துடன் தற்போது நாட்டில் தனி மனித சுதந்திரம் இல்லாமலாக்கப்பட்டுள்ளது.
மேலும் தொலைபேசியை ஒட்டுக் கேட்பது தொடர்பாக சபாநாயகர் கரு ஜயசூரியவுடன் கதைத்தேன். அது தொடர்பாக ஆராய்ந்து பார்ப்பதாக அவர் என்னிடம் தெரிவித்தார் என்றார்.
