“புதிய அரசியலமைப்பு தயாரிப்பதற்கு மாநாயக்க தேரர்கள் எதிர்ப்பில்லை. ஒரு சில தேரர்கள் கூறிய கருத்துகளுக்கு மாநாயக்கர்கள் பொறுப்பில்லை. இது தொடர்பில் மாநாயக்க தேரர்களை அறிவுறுத்தவுள்ளோம். அத்துடன் ஐக்கிய தேசியக் கட்சி புதிய அரசியலமைப்பை கொண்டு வருவதனாலேயே இவர்கள் எதிர்க்கின்றனர்” என உயர்கல்வி மற்றும் நெடுஞ்சாலை அபிவிருத்தி அமைச்சர் லக்ஷ்மன் கிரியெல்ல தெரிவித்தார்.
புதிய அரசியலமைப்பு தொடர்பில் வினவியபோதே அமைச்சர் கேசரிக்கு மேற்கண்டவாறு தெரிவித்தார்.
அமைச்சர் லக்ஷ்மன் கிரியெல்ல மேலும் குறிப்பிடுகையில்,
“புதிய அரசியலமைப்பு பணிகள் தயாரிக்கப்பட்டு வருகின்றன. எனினும் அரசியலமைப்புக்கு மாநாயக்க தேரர்கள் எதிர்ப்பு வெளியிடுவதாக கூறுகின்றனர். மாநாயக்க தேரர்கள் அரசியலமைப்பை உருவாக்குவதற்கு எதிர்ப்பில்லை. எனினும் இது தொடர்பில் ஏனைய தேரர்கள் வெவ்வேறு கருத்துகளை தெரிவிக்கின்றனர். அதனை ஏற்க முடியாது.
அரசியலமைப்பு பணிகளை நாம் ஒருபோதும் நிறுத்த போவதில்லை. புதிய அரசியலமைப்பு தயாரிப்பதற்கு மாநாயக்க தேரர்கள் எதிர்ப்பில்லை. ஒரு சில பிக்குகள் கருத்து தெரிவித்தமைக்கு மாநாயக்கர்கள் பொறுப்பில்லை. இது தொடர்பில் மாநாயக்கர்களை அறிவுறுத்தவுள்ளோம்.
அத்துடன் ஐக்கிய தேசியக் கட்சி புதிய அரசியலமைப்பை கொண்டு வருவதனாலேயே இவர்கள் எதிர்க்கின்றனர். ஐக்கிய தேசியக் கட்சி இடைக்கால அறிக்கையில் யோசனை முன்வைக்கவில்லை என்பது பிரச்சினையல்ல. ஏனெனில் ஐக்கிய தேசியக் கட்சியே அரசியலமைப்பு பணிகளில் முன்னிலை வகிக்கின்றது.
மேலும் மாகாண சபை முறைமையை ஐக்கிய தேசிய கட்சியே கொண்டு வந்தது. அத்துடன் தற்போதைய அரசியலமைப்பை ஐக்கிய தேசியக் கட்சியே கொண்டு வந்தது. இதனால்தான் இவ்வளவு எதிர்ப்பினை வெளியிடுகின்றனர்.
அதேபோன்று உள்ளூராட்சி மன்ற தேர்தலுக்கான ஏற்பாடுகள் முன்னெடுக்கப்பட்டு வருகின்றன. இதன்பிரகாரம் ஐக்கிய தேசியக் கட்சி தேர்தலுக்கு தயாராக உள்ளது. மேலும் உள்ளூராட்சி மன்ற தேர்தலில் பெரும்பான்மை வாக்குகளினால் நாம் வெற்றி பெறுவோம் என்றார்.
