உடலில் குண்டுத் துகள்களுடன் மிகவும் ஆபத்தான நிலையில் வாழும் யாழ்ப்பாணம் மற்றும் வவுனியா பிரதேசங்களைச் சேர்ந்த 410 பேரின் விபரங்களை நேற்றையதினம் (செவ்வாய்க்கிழமை) நாடாளுமன்றத்தில் தமிழ்த் தேசியக் கூட்டமைப்பு நாடாளுமன்ற உறுப்பினர் சிவசக்தி ஆனந்தன் சமர்ப்பித்துள்ளார்.
இந்தப் பட்டியலில் 132பேர் பாடசாலை மாணவர்கள் எனத் தெரிவித்த தமிழ்த் தேசியக் கூட்டமைப்பு நாடாளுமன்ற உறுப்பினர் சிவசக்தி ஆனந்தன், யுத்தத்தில் மிகவும் மோசமாகப் பாதிக்கப்பட்டுள்ள முல்லைத்தீவு மற்றும் கிளிநொச்சி மாவட்ட அரசாங்க அதிபர்கள் குறித்த விபரங்களை வழங்குவதற்கு இழுத்தடிப்புச் செய்கின்றனர் எனவும் சபையில் குற்றஞ்சாட்டியுள்ளார்.
நாடாளுமன்றத்தில் நேற்று விலங்குத்தீனி (திருத்தச்) சட்டமூலம் மீதான விவாதம் நடைபெற்றது. இதில் கலந்து கொண்டு உரையாற்றுகையிலேயே தமிழ்த் தேசியக் கூட்டமைப்பின் வன்னி மாவட்ட பாராளுமன்ற உறுப்பினர் சிவசக்தி ஆனந்தன் மேற்கண்டவாறு தெரிவித்தார்.
மேலும் அவர் தெரிவிக்கையில், கடந்த ஜூலை மாதம் 8ஆம் திகதி நடைபெற்ற பாராளுமன்ற அமர்வில் பிரதமருடனான கேள்வி நேரத்தின்போது, வடக்கில் இடம்பெற்ற யுத்தத்தின் போது குண்டு மற்றும் ஷெல்
வீச்சுக்களால் பாதிப்படைந்து அவற்றின் துகள்களுடன் ஆபத்தான நிலையில் பாடசாலை மாணவர்கள், இளைஞர், யுவதிகள் உள்ளிட்ட பல தரப்பட்டவர்கள் காணப்படுகின்றார்கள். அவர்களுக்கு சத்திரசிகிச்சை வழங்குவதற்கு உரிய நடவடிக்கை உடன் எடுக்கப்பட வேண்டுமென கோரிக்கை விடுத்திருந்தேன்.
அச்சமயத்தில் பிரதமர் விபரங்களை வழங்குமாறும், தான் மீள்குடியேற்ற மற்றும் சுகாதார அமைச்சருடன் கலந்துரையாடி அவர்களை அவர்களது பிரதேச அரசாங்க வைத்தியசாலையில் சிகிச்சை பெறுவதற்கு நடவடிக்கை எடுப்பதாக பிரதமர் உறுதியளித்திருந்தார்.
இந்நிலையில், நான் நான் வடக்கு மாகாணத்தின் ஐந்து மாவட்ட அரசாங்க அதிபர்களுக்கு கடிதம் மூலம்விபரங்களை வழங்குமாறு கோரியிருந்தேன். 65 நாட்களாகிவிட்டன. வெறுமனே இரண்டு மாவட்ட அரசாங்கஅதிபர்களே அந்த தகவல்களை வழங்கியுள்ளனர். அதனடிப்படையில் யாழ்.மற்றும் வவுனியா மாவட்டத்தினைச் சேர்ந்த 410 பேர் இவ்வாறு குண்டு துகள்களுடன் ஆபத்தான நிலையில் உள்ளனர். இவர்களில் 132 பேர் பாடசாலை மாணவர்களாக உள்ளனர். அதிகளவானோர் இளம் வயதினைக் கொண்டிருக்கின்றனர். இவர்களுக்கு உடனடிச் சிகிச்சைகள் அவசியமாகின்றன. ஆகவே இந்தப்பட்டியலின் பிரகாரம் உடனடி நடவடிக்கைகளை அரசாங்கம் எடுக்க வேண்டும் எனவும் கோரிக்கை விடுத்துள்ளார்.
