தீபாவளியினை முன்னிட்டு புத்தளம் பகுதியிலிருந்து தலவாக்கலைப் பகுதிக்கு வர்த்தக நடவடிக்கைக்காக வருகை தந்த இளைஞன் ஒருவர் நேற்று முன்தினம் இரவு முதல் காணவில்லையென தலவாக்கலை பொலிஸ் நிலையத்தில் முறைப்பாடு செய்யப்பட்டுள்ளது.
காணாமல் போயுள்ளவர் புத்தளம் கந்தகுடா பகுதியைச் சேர்ந்த முகமது நிலாம்தீன் முகமது அஸ்ஜட் வயது 18 என அடையாளம் காணப்பட்டுள்ளனர்.
இவர் கடந்த 2017.10.10 திகதி தலவாக்கலை பகுதிக்கு வருகை தந்து தலவாக்கலை நகர சபையின் கடையொன்றினை வாடகைக்காக பெற்று ஹட்டன் நுவரெலியா பிரதான வீதியில் தலவாக்கலை தமிழ் மகா வித்தியாலயத்துக்கு முன்பாக வர்த்தக நடவடிக்கையில் ஈடுபட்டு வந்துள்ளார்.
கடந்த 17 ஆம் திகதி இரவு கழிப்பறை செல்வதாக கூறிவிட்டு சென்ற இளைஞன் நேற்று வரை மீண்டு வராதமையினால் பொலிஸ் நிலையத்தில் முறைப்பாடு செய்யப்பட்டுள்ளது.
குறித்த இளைஞனுக்கு என்ன நடந்தது என்பது தொடர்பாக பல்வேறு கோணங்களில் விசாரணைகளை முன்னெடுத்துள்ளதாக தலவாக்கலை பொலிஸார் தெரிவித்தனர்.
